अनुपमा कट्टेल
डिमापुर
नागाल्यान्ड
Email:Kattelanu11@gmail.com
निस्पट अँध्यारा रातहरूको मुटु चिर्दै ;
ब्युँझिएका सपनाहरू
एउटा बिरानो ठाउँमा पुग्छन् ,
निद्राहरू सोच्न थाल्छन्
बिरानो ठाउँमा सपनाहरूको
कुनै मूल्य होला र ?
आजभोलि मूल्यको बारेमा
कसले सोच्छ
कसले पल्टाउँछ
न्यायको पुस्तक
म मन मनै भन्छु।
समयले किन यस्तो कोल्टे फेर्छ ?
सत्यका पक्षधरहरू
समाजमा किन एक्लो बृहस्पति हुन पुग्छन् ?
उसलाई व्याङ्ग्य वाण हानिन्छ ;
सत्यताको विरोधमा
भयङ्कर असहमति प्रकाश गर्दै
न्यायलाई निराशाको खाडलमा हुत्याइन्छ ।
त्यसैले, सबै सबै सत्यतालाई बिर्सिएर;
मानिसले मौनताको आश्रय लिनु पर्ने हुन्छ,
सहनशीलताको अभिनय गर्नु पर्ने हुन्छ
आँटहरू लुकाउनु पर्ने हुन्छ कुनै गुप्त स्थानमा ।
त्यसपछि खुल्ला मैदानमा असत्यले ताण्डव नाच्न थाल्छ;
जुन दिन सत्यताले भद्रताको घुम्टो ओढेर
शान्तिको सास फेर्ने निर्णय लिन खोज्छ ,
त्यसै दिनदेखि असत्यले हैकम जमाउन थाल्छ
एक अर्काका विचारहरू।
असहमतिको होडमा मक्किएर जाँदा
तार्किकतालाई बिर्सिएर मानिसका हाँच,
हावा र हल्लामा कुदेको देख्ता
न्यायलाई अवज्ञा गर्दै ;
अर्थहीन र स्वार्थी विचारको घोडा चडी
एउटा सिङ्गो समाजलाई भ्रमित पार्दै ।
कतिपय निरर्थक, मूल्यहीन, घातक तत्त्वहरूले;
आफ्नो बोलबाला चलाएका देख्ता
मेरा मुटुका सत्यमय लाभाहरू,
उकुसमुकुस गर्दै बाहिरिन चाहन्छ्न्।
जिन्दगीका मिठा मिठा पलहरू
सुन्दर इन्द्रेणी सपनाहरू ;
भ्रमका काला बादलहरूले
ढक्क छोप्न थालेका छन् ,
मानौं यहाँ सत्यता र न्यायका बाटाहरूका;
सबै पुलहरू तोड्दै
अन्याय राज चलाउने
सबै आयोजना गरिसकेका छ्न् असत्य
र उसका शाखा-सन्तानहरूले।
शान्ति र प्रगतिका
मिलन र भाइचाराका सबै सबै बाँटाहरू
साँगुरिँदै साँगुरिँदै गोरेटो मात्र भइसके
यी साँगुरा बाटाहरूमा
सपनाहरूलाई फुल्न ठाउँ कहाँ पुग्छ र?
शान्तिले ढुक्कले सुत्ने
एक सुरक्षित छातीमा ढलिमली गर्ने
र आफ्नै श्रमको पसिनाले भविष्य फलाउने
रहर त छ सपनाहरूलाई
तर अलमल्ल पर्नु परेको छ
ती रङ्गमन्चमा जाने सबै सबै
नाकाहरू बन्द भइसकेपछि।
जसको व्यवहारमा महाशून्यको
झोलुङ्गो छ त्यसैलाई ,
अन्तिम सत्य मान्ने अवधारणाहरूसँग
अनिश्चापूर्वक सहमति प्रकाश नगर्न,
निरन्तर विवेकको चेतावनी
र परिस्थिको बीचको द्वन्द्वमा।
विभ्रान्त सपनाहरू डोहोर्याएर;
यो यात्रा कतिदिनसम्म गर्ने ?
एक छाती आँट
एक मन दृढता
एक विवेक अठोटको प्रतीक्षामा छ्न्
सपनाहरू सत्यको गुहार माग्दै;
बिपना भएर बौरिन चाहन्छ्न्
एउटा अनुकूल वातावरणमा।
_____________________
Post a Comment